1Jo 1 | KQC | STEP | Mina amiye, kaere bi vegu di sina, ini adinari gutu amegamo mina ya vene rofu nigifa. Una bi uni anemari yaku neideyafa ma uni nemoko dudu veyafa. Sena veyafa ma uni vana dudu ka avaka moiyafa.

b 1.2:Jn 1.14

1 John 1

Vegu di ago

1 Mina amiye, kaere bi vegu di sina, ini adinari gutu amegamo mina ya vene rofu nigifa. Una bi uni anemari yaku neideyafa ma uni nemoko dudu veyafa. Sena veyafa ma uni vana dudu ka avaka moiyafa. ^a 2 Mina amiye mina bae ogau niyo ri, bi veyafa, ye mina ago nisifa ma toga ameibobina vegu mina ya nisifa goina bi Baba sa mina una oteimaradi. ^b 3 Beika veyafa ma neideyafa mina bi ya vene rofu ka ya nisifa, ye ya ka una sa vakoi Baba ma ini Mida Iesu Keriso sa auta rena di. 4 Mina bura resifa bi uni ^{▼▼1.4uni;bura bedakai biyinufa.} ada mina bae rama aiyainedi.

Sei bi vabara

5 Gua beika ago ini Mida rofu neideyafa bi yomini: Sei bi vabara, mukuna yokoi ina rofu de. 6 Una yaku nisifa, una bi ina sa auta resifa vo nisifa idu mina regasa ma mukunari disifa vo nisi bi, una bi uniye ofa nisifa, uni agori ma uni reremamari. 7 Idu ina bi vabara mina resi una ka vabarari amesifa — makai vo nisi uni usika ourena sa auta resifa ma ini Mida Iesu di ini dava yaku uni vegu no tau koite makudo.

8 Ma una yaku nisifa una bi vegu no de vo nisifa ri, bi uniye moi no resifa, ma sina rama yokoi una sa de. 9 Idu uni vegu no ni rausi resifa Sei rofu di vo nisi bi, ini beika niyo mina moi gira risi ma beika buni mina una rofu rego: uni vegu no erufusi ma buni de vegu resifa rofu una koite makugo. 10 Una yaku nisifa una bi vegu no de resifa vo nisi bi, Sei bi moi ofaofa amiye rofu aisifa, ma ini ago bi una sa de.